Segundo as cifras dadas a coñecer onte na Enquisa de Poboación Activa (EPA) o paro aumentou en España en 217.200 persoas só no terceiro trimestre.
A cifra sitúa o número total de desempregados en 2.598.800, o dato máis alto desde 2000.
Nun ano, os traballadores sen emprego aumentaron en 806.900, un 45,03%. En consecuencia, a taxa de paro subiu o 0,88% e sitúase nestes momentos no 11,33% da poboación activa, a porcentaxe máis elevada desde o primeiro trimestre de 2004. No que vai de ano 2.445 traballadores fóronse ao paro cada día. O dato contén feitos preocupantes, por primeira vez en 14 anos, desde a crise dos noventa, destrúese emprego. En termos interanuais, de setembro a setembro, o número de ocupados diminuíu en 164.300 persoas (0,8%) e sitúase en 20.346.300 cidadáns.
Un dos efectos é o aumento do número de fogares con todos os seus membros en idade de traballar desocupados. No último trimestre, o seu número aumentou en 84.300, un 15,2%. Suman xa 638.000.
O deterioro no último trimestre non se limita ao sector da construción (57.600 novos parados), afecta tamén á industria, con 27.200 novos parados nos últimos tres meses e á agricultura (26.900). Nin sequera o flotador económico tradicional da economía española, o sector servizos (47.700 parados máis nos últimos tres meses), serve para manter o tipo.
Por primeira vez desde 1994, o número de parados homes nun trimestre superou ao de mulleres: 170.700 parados homes máis, fronte a 46.600 mulleres. A taxa de paro, con todo, segue sendo máis elevada entre as mulleres: 12,66% fronte ao 10,32% dos homes. E é tamén máis elevada entre os estranxeiros (taxa do 17,45% e 43.100 novos parados entre xullo e setembro) que entre os españois (10,20% de taxa de paro e 174.100 novos desempregados).
E o peor parece que aínda está por chegar.
via: el país
